Fyrsta uppist­andið hét „Af hverju ég sef ekki hjá stelp­um“

Pálmi Freyr Hauksson er gestur vikunnar í Athyglisbresti á lokastigi. Hann er spunaleikari, sketsahöfundur, leikskáld og hefur helgað líf sitt gríninu. Á dögunum fór hann af stað með hlaðvarpið Einhleyp, einmana og eirðarlaus og það er undarleg tilfinning fyrir Pálma að aðaláherslan sé ekki að vera fyndinn.

Fyrsta uppistandið einlæg vitundarvakning

Salka, Pálmi og Lóa kryfja í þættinum hina aldagömlu spurningu spuni v.s. uppistand? Pálmi segir frá því þegar hann var með uppistand í fyrsta skipti. „Uppistönd eru algjör snilld, en mér finnst erfitt að fara á uppistönd sjálfur, eftir að hafa verið í þessu þegar ég var 22 ára, þegar ég dýfði tánni í uppistandslaugina,“ segir Pálmi „Það var svo mikill kvíði sem fylgdi uppistandinu. Ég var sjálfur að tala um svo ótrúlega persónulega hluti. Ég var þekktur sem gaurinn sem fór heim með stelpum en svaf aldrei hjá þeim.“

Pálmi las Stríð og frið og er þar af leiðandi betri en við

Af hverju les fólk bækur? Örugglega til þess að skilja sjónvarpsþætti betur. „Mig langaði að skilja vísanir í Stríð og frið,“ segir Pálmi sem tekur þó fram að Kópavogskrónika hafi verið betri en Stríð og friður eftir Tolstoy. “Já, þannig þú last basically langa Wikipedia grein,“ segir Lóa sem trúir ekki á gildi bókmennta lengur.

Hlustaðu á podcastið í heild sinni í spilaranum að ofan eða í hlaðvarpsveitu að eigin vali.