Fund­ust engin íþrótta­föt á Birgittu dúkk­una

Birgitta Haukdal er viðmælandi Birnu Maríu í nýjasta þætti GYM.

Birgitta Haukdal var gestur Birnu í nýjasta þættinum af GYM. Í þættinum spjalla þær saman um ferilinn, heilsuna og frægu Birgittu dúkkuna.

„Mér finnst eins og ég hafi ekki andað í 40 ár,“ segir Birgitta en hún talar um hvað jóga hefur hjálpað henni mikið við að stoppa aðeins og anda. Hún segir að þegar allt Írafár ævintýrið fór stað hafi hún sjaldan haft tíma til að stoppa og anda.

Þær Birgitta og Birna tóku vel á því saman. Birna kenndi Birgittu nokkrar ketilbjölluæfingar og svo komu þær sér vel fyrir uppi í jógasal þar sem Birgitta leiðir Birnu í gegnum nokkrar jógaæfingar. Að lokum var Birgittu-dúkkan sjálf með innkomu og Birna spyr hvað Birgitta vill segja við þessa Birgittu. Því miður fundust engin íþróttaföt á Birgittu dúkkuna en engu að síður flýgur hún í splitt.

Flutti í bæinn til að syngja

Birgittu Haukdal þarf vart að kynna en hún hefur notið hylli þjóðarinnar í meira en tuttugu ár. Birgitta er alin upp á Húsavík og flutti í bæinn til þess að gerast söngkona. Stuttu síðar var hún orðin meðlimur hljómsveitarinnar Írafár og þá fór boltinn að rúlla. Þjóðþekkt lög litu dagsins ljós, lög eins og Fingur, Ég sjálf og Stórir hringir. Írafár fór að gigga um land allt.

Birgitta var þó hvergi nærri hætt og tók þátt í ýmsum öðrum verkefnum. Meðal þeirra verkefna var sýningin Grease sem var sett upp í Borgarleikhúsinu árið 2003 þar sem hún fór með hlutverk Sandy. Sama ár hélt hún út til Riga í Lettlandi fyrir Íslands hönd og tók þar þátt í Eurovision með laginu Segðu mér (e. Open your heart).

Sömuleiðis lék hún Geddu gulrót í Ávaxtakörfunni sem var sett upp árið 2015.

GYM er unninn í samstarfi við World Class.