Jack White sigrar Eurovision

Rokkstjarnan, goðsögnin og lagasmíðasnillingurinn Jack White getur bætt við sigri í söngvakeppninni Eurovision á ferilskránna. Nú í vikunni bárust nefnilega fréttir þess efnis að Jack White væri skráður sem lagasmiður á laginu Toy með ísraelsku söngkonunni Netta.

Ísraelski fréttamiðilinn Kan greindi fyrst frá þessu í vikunni. Þar er greint frá því að Universal Music Group sendi beiðni þess efnis eftir sigur lagsins í Eurovision 2018 að Jack White yrði bætt við sem lagahöfund vegna líkinda viðlagsins við hið sívinsæla Seven Nation Army með hljómsveit hans The White Stripes. Miklar samningaviðræður hafa staðið yfir síðan þá og lítur út fyrir að samningar hafi náðst í vikunni.

Ekkert hefur heyrst frá Jack White en fjölmiðlafulltrúi sendinefndar Ísrael í Eurovision 2018, hann Amnon Szpektor, greindi frá því að trúnaður ríkti um smáatriði samningsins og að hún Netta myndi ekki tjá sig efnislega um þessar fréttir.

Eurovision verður haldið í Ísrael 2019 og hafa margir kallað eftir sniðgöngu íslendinga í keppninni í ár vegna mannréttindabrota og aðskilnaðarstefnu Ísraela. Blásið var til undirskriftarsöfnunar þess efnis þegar ljóst var að keppnin yrði haldin í Ísrael.

Undraland, alla virka daga á milli kl. 11 og 15, í boði Macland.